Akola Vidhansabha Election 2024:राज्यात विधानसभा निवडणुका (Maharashtra Assembly Election 2024) जाहीर झाल्यापासून राजकीय घडामोडींना वेग आला आहे. दरम्यान, अकोल्याचा राजकारणात काल दिवसभरात अनेक नाट्यमय घडामोडी घडल्या. एकीकडे महाविकास आघाडी आणि महायुतीत सामना रंगणार असल्याचं दिसत असलं तरी दुसरीकडे प्रहार जनशक्ती पक्षाचे अध्यक्ष बच्चू कडू यांनी तिसऱ्या आघाडीची वेगळी चूल मांडल्याचे चित्र आहे. प्रहारचे प्रदेशाध्यक्ष अनिल गावंडे यांनी बच्चू कडूंची साथ सोडत भाजपमध्ये प्रवेश करणार असल्याचे कळल्यानंतर आता बच्चू कडूंनी भाजपचा बडा मासा गळ्याला लावत अकोल्यातील राजकारणाचा गेम फिरवल्याचं दिसतंय.
8 वर्ष भाजपचे शहराध्यक्ष राहिलेले आणि सध्या प्रदेश कार्यकारणी सदस्य असलेले भाजपचे अशोक ओळंबे यांनी प्रहारमध्ये प्रवेश केला असून आज ते विधानसभेचा उमेदवारी अर्ज भरणार असल्याचं सांगण्यात येत आहे. अकोल्यातून भाजपने माजी शहराध्यक्ष विजय अग्रवाल यांना तिकीट दिलं आहे. तर बच्चू कडूंनी भाजपच्या शहराध्यक्षाला प्रहारमध्ये घेत दंड थोपटले आहेत.
बच्चू कडूंच्या प्रहारमध्ये मोठं इनकमिंग
काल दिवसभरात बच्चू कडूंच्या प्रहार जनशक्ती पक्षात मोठंच ‘इनकमिंग’ झाल्याचं दिसलं. एकीकडे भाजपचे आठ वर्ष अकोला शहराध्यक्ष राहिलेले आणि सध्या प्रदेश कार्यकारणी सदस्य असलेले डॉ अशोक ओळंबे यांनी प्रहारमध्ये प्रवेश केला. तर दुसरीकडे राष्ट्रवादी काँग्रेसच्या अजित पवार गटाचे जिल्हाध्यक्ष कृष्णा अंधारे यांचाही मध्यरात्री प्रहारमध्ये प्रवेश झाल्याचं कळतं. बाळापुर मतदारसंघ शिंदे गटाच्या ताब्यात गेल्यानंतर अजित पवारांच्या राष्ट्रवादीला या जिल्हाध्यक्षांनी ‘रामराम’ ठोकत प्रहारमध्ये प्रवेश केला आहे. बाळापुर मतदारसंघातून कृष्णा अंधारे आता प्रहारचे उमेदवार असतील. त्यामुळे अजित पवार गटाला बाळापुर मतदारसंघात मोठाच धक्का बसल्याचं सांगण्यात येतंय.
3 पक्ष बदलत शेवटी प्रहार तिकीट
गेल्या काही दिवसांमध्ये बच्चू कडूंच्या प्रहार मध्ये अनेकांचा पक्षप्रवेश होत आहे. तीन दिवसांपूर्वीच राष्ट्रवादी शरद पवार गटातून भाजपात प्रवेश करणारे रवी राठी यांनी प्रहार पक्षात प्रवेश केला होता. एकाच आठवड्यात तीन पक्ष बदलण्याचा अनोखा विक्रम रवी राठी यांनी केल्याची चर्चा आहे. दरम्यान मुर्तीजापुर मधून भाजपकडून रवि राठी यांना तिकीट मिळणार असल्याचं सांगितलं जातंय. 2019 च्या निवडणुकीत रवी राठींना राष्ट्रवादीचे तिकिटावर तिसऱ्या क्रमांकाची म्हणजेच 42000 मते मिळाली होती. दरम्यान मध्यरात्री डॉक्टर अशोक कोळंबे यांचा निवासस्थानी प्रहार मध्ये प्रवेश केल्यानंतर आता मूर्तिजापूरमधून रवी राठी हे प्रहार चे उमेदवार असतील.
हेही वाचा:
अधिक पाहा..
