by Hansraj Agrawal | Mar 12, 2025 | Trending News
Gold Price Today: भारतीय आणि आंतरराष्ट्रीय बाजारात सोन्याच्या किंमतीत चढ-उतार होताना दिसत आहे. सराफा बाजारातही 86,000च्या जवळपास सोनं ट्रेड करत आहे. आंतरराष्ट्रीय स्तरावर सोन्याच्या किंमतीत वाढ झाली आहे. आज $ 2,920 रुपयांवर व्यवहार करत आहे. गेल्या तीन महिन्यात सोन्याच्या किंमतीत 10 टक्क्याने वाढ झाली आहे. तर, या वर्षात आत्तापर्यंत 12 टक्क्यांची तेजी आली आहे. आंतरराष्ट्रीय स्तरावर अनिश्चितता आणि अमेरिकेच्या अर्थव्यवस्थामुळं वाढती चिंता यामुळं डॉलरच्या कमजोरीमुळं सोनं महागला आहे.
डॉलरच्या कमजोरीमुळं गुंतवणुकदार सोन्यात सुरक्षित गुंतवणुक करताना दिसत आहेत. अमेरिकेत वाढत्या चिंतेमुळं गुंतवणुकदार सोन्याचा पर्याय स्वीकारत आहेत. काल सोन्याच्या दरात घसरण झाली होती. त्यानंतर आज मात्र सोन्याचे दर वधारले आहेत. आज 22 कॅरेट सोन्याचे दर 80,650 रुपये झाले आहेत. तर 24 कॅरेट सोन्याचे दर 87, 980 रुपयांवर पोहोचले आहे. 18 कॅरेट सोन्याचे दर 65,990 रुपयांवर पोहोचले आहे.
काय आहेत सोन्याचे दर?
ग्रॅम सोनं किंमत
10 ग्रॅम 22 कॅरेट 80,650 रुपये
10 ग्रॅम 24 कॅरेट 87,980 रुपये
10 ग्रॅम 18 कॅरेट 65,990 रुपये
ग्रॅम सोनं किंमत
1 ग्रॅम 22 कॅरेट 8,065 रुपये
1 ग्रॅम 24 कॅरेट 8,798 रुपये
1 ग्रॅम 18 कॅरेट 6,599 रुपये
ग्रॅम सोनं किंमत
8 ग्रॅम 22 कॅरेट 64, 520 रुपये
8 ग्रॅम 24 कॅरेट 70,384 रुपये
8 ग्रॅम 18 कॅरेट 65,990 रुपये
मुंबई – पुण्यात कसे असतील सोन्याचे दर?
22 कॅरेट-80,650 रुपये
24 कॅरेट- 87,980 रुपये
18 कॅरेट-65,990 रुपये
Source link
by Hansraj Agrawal | Mar 11, 2025 | Trending News
Airtel Gallery Marathi Language: मराठी का आलं पाहिजे? असं कुठे लिहिलं आहे? मराठी येत नसेल तर महाराष्ट्रात राहू शकत नाही असं कुठे लिहिलं आहे? अशी विचारणा दुसरीकडे कुठे नाही तर थेट मुंबईत एका तरुणीने केली आहे. एअरटेलच्या गॅलरीत महिला कर्मचाऱ्याने मराठी तरुणाशी वाद घालताना आपण मराठीत बोलणार नाही अशी मुजोरी दाखवली. तरुणाने हा सर्व प्रकार आपल्या कॅमेऱ्यात कैद केला असून, काही वेळातच हा व्हिडीओ तुफान व्हायरल झाला. चारकोप मधील एअरटेल गॅलरीत हा प्रकार घडला आहे. यानंतर मराठी बोलण्यास नकार देणाऱ्या एअरटेल मधील कर्मचाऱ्यांवर कारवाई करा, अन्यथा मुंबईत एअरटेलची गॅलरी दिसणार नाही असा इशारा शिवसेना ठाकरे गटाचे राज्य संघटक अखिल चित्रे यांनी दिला आहे.
व्हिडीओत नेमकं काय?
व्हिडीओत मराठी तरुण एअरटेल गॅलरीत उभा असल्याचं दिसत आहे. आपण मागील अर्ध्या तासापासून येथे थांबलो असून, आपली समस्या सोडवली जात नाही. तसंच मराठीत बोलण्यास नकार देत उद्धटपणा केली जात असल्याची तक्रार तो व्हिडीओच्या सुरुवातीला करताना दिसतो. यानंतर व्हिडीओत महिला कर्मचारी आपण मराठीत बोलणार नाही असं सांगत वाद घालताना दिसत आहे.
व्हिडीओत तरुण सांगतो की, “मी इथे एअरटेल गॅलरीत आलो आहे. मला माझ्या समस्या सोडवून द्या म्हणून मी विनंती करत आहे. गेल्या अर्ध्या तासापासून मी बसलो आहे. मी मराठीत बोला सांगितल्यावर का मराठीत बोलू? तुम्हाला हिंदी येत नाही का? असं विचारत आहेत. मराठी बोलायला आलंच पाहिजे. मला पोलिसांची धमकी देत आहेत”.
यानंतर व्हिडीओत महिला कर्मचारी दिसते. अरबाज सर, हा कस्टमर व्हिडीओ बनवत आहे. मला म्हणतो महाराष्ट्रात राहायचं असेल तर मराठी बोला असं ओरडून सांगत आहे अशी तक्रार ती करते. यावेळी बाहेर उभा मुलगा मराठी येत नसेल तर? अशी विचारणा करतो. त्यावर तरुण त्यांना मराठी आलंच पाहिजे असं सांगतो. त्यावर महिला कर्मचारी त्याच्याशी वाद घालत का भाई, का मराठी आलं पाहिजे? असं कुठे लिहिलं आहे? मराठी येत नसेल तर महाराष्ट्रात राहू शकत नाही असं कुठे लिहिलं आहे? अशी विचारणा करते. यादरम्यान तरुण तिला मला हात लावू नका बजावतो. त्यावर तीही मला तुला हात लावण्याची हौस नाही असं सांगते.
महिला कर्मचारी आरडाओरड करत असल्याने तरुण तिला आवाज कमी करा असं सांगतो. त्यावर ती मी असंच बोलणार असं उत्तर देते. हे तुमच्या मालकीचं आहे का? अशी विचारणा तरुण करतो. त्यावर ती मला मराठी समजत नाही, हिंदीत बोलायचं असं सांगते. त्यावर तरुण हिंदीत बोलण्यास नकार देत, मराठी समजून घ्यायचं असं सांगतो. त्यानंतर आपण भारतात राहतो, इथे कोणत्याही भाषेत बोलू शकतो असं सांगते. मॅनेजर आल्यानंतर महिला कर्मचाऱ्याची मुजोरी कमी होताना दिसत नाही. महाराष्ट्रात मराठी महत्त्वाची नाही असं ती सांगताना दिसते.
अखिल चित्रेंचा एअरटेलला इशारा
एअरटेल प्रशासनाने नोंद घेऊन कर्मचाऱ्यांना मराठी भाषेचं महत्त्व समजावून सांगावं. महाराष्ट्रात एअरटेलचे असंख्य मराठी ग्राहक आहेत ते कायम ठेवायचे असतील तर योग्य पाउलं उचला नाहीतर मुंबईत एअरटेल ची गॅलरी दिसणार नाही असा इशारा शिवसेना ठाकरे गटाचे राज्य संघटक अखिल चित्रे यांनी दिला आहे. तसंच इतर भाषेचा विरोध नाही पण मराठी भाषिक 80 टक्के कर्मचारी असायलाच हवे असंही सांगितलं आहे.
Source link
by Hansraj Agrawal | Mar 11, 2025 | Trending News
What Is Halal And Jhatka Meat: भाजप नेते आणि मंत्री नितेश राणे यांनी झटका मटण दुकानांना मल्हार प्रमाणपत्र देण्याची घोषणा केली आहे. सध्या बाजारात दोन प्रकारचे मटण-चिकन मिळतात. एक झटका प्रकार असतो तर एक हलाल प्रकार असतो. पण एकाच प्राण्याचे मांस मात्र या दोन्ही प्रकारांमध्ये फरक काय? असा सवाल तुमच्याही मनात येत असेल. तर आज जाणून घेऊया हलाल आणि झटका मांस यातील फरक काय आहे ते.
हलाल आणि झटका ही मांस कापण्याची एक पद्धत आहे. हलाल शब्द हा अरबी आहे. त्याचा हिंदीत अर्थ मान्य असा आहे.
हलाल मांस म्हणजे काय?
हलाल पद्धतीने जनावरांची कत्तल करणे म्हणजे जनावराच्या मानेवरील रक्तवाहिनीवर एक कट मारला जातो. त्यामुळं प्राण्याच्या शरीरातील सर्व रक्त बाहेर येते. पण या प्रक्रियेत प्राण्याचा तडफडून मृत्यू होतो. इस्लामिक श्रद्धेनुसार, फक्त हलाल मांसच खाऊ शकतात. हलाल करताना जनावराच्या शरीरातून संपूर्ण रक्त बाहेर पडण्याची वाट पाहिले जाते. तसंच, प्राणी मेल्यानंतर त्याच्या शरीराचे वेगवेगळे हिस्से केले जातात. या प्रक्रियेला जिबाह असंही म्हणतात. बकरी ईदला हलाल पद्धतीने मेंढ्या आणि बकऱ्यांचा बळी दिला जातो. त्यासाठी प्राणी निरोगी आणि जिवंत असणे गरजेचे आहे.
इस्लामप्रमाणेच ज्यूदेखील हलाल प्रकारचे मटण खातात. त्यांला कोशेर असं म्हणतात. दोन्ही धर्मांमध्ये अशा प्रकारे प्राण्यांची कत्तल त्या त्या धर्माच्या व्यक्तीनेच करणे बंधनकारक असते. सोबतच दोन्ही प्रकारच्या प्रक्रियेत डुक्कर हा प्राणी वर्ज्य असतो.
झटका मांस म्हणजे काय?
झटका मांस म्हणजे एकाच झटक्यात प्राण्याची मान धडापासून वेगळे करणे. झटक्यातील प्राण्याला मारण्यापूर्वी त्याला बेशुद्ध केले जाते. प्राण्याला मरण्यापूर्वी जास्त वेदना होऊ नयेत, हा त्यामागचा उद्देश असतो. तसंच, झटका पद्धतीने मांस कापण्यापूर्वी झटक्याला उपाशी ठेवले जाते. झटका पद्धत हिंदू आणि शीख धर्मात वापरली जाते.
(Disclaimer: येथे दिलेली माहिती सामान्य माहितीवर आधारित आहे. ZEE 24 TAAS त्याची पुष्टी करत नाही.)
Source link
by Hansraj Agrawal | Mar 10, 2025 | Trending News
Beed Crime: सतीश भोसले उर्फ खोक्यावर शिरूर पोलीस ठाण्यात दोन गुन्हे दाखल झालेत. गुन्हे दाखल झाल्यापासून गेल्या चार दिवसांपासून खोक्या फरार आहे. खोक्याला पकडण्यात पोलिसांना अद्यापही यश आलेलं नाहीय. त्यामुळे खोक्याच्या मुसक्या कधी आवळल्या जाणार याची चर्चा सुरू झालीय.बुलढाणा जिल्ह्यातील एका व्यक्तिला मारहाण केल्या प्रकरणी बीडच्या सतीश भोसले उर्फ खोक्या विरोधात दोन गुन्हे दाखल करण्यात आलेत. एका व्यक्तीला बॅटने मारहाण करतानाचा व्हिडिओ समोर आल्यानंतर गुंड खोक्यावर हे गुन्हे दाखल झालेत.. यात पोलिसांनी स्वतः फिर्यादी होत पहिला गुन्हा नोंदविलाय. तर बावी परिसरात ढाकणे पिता पुत्राला मारहाण केल्याप्रकरणी खोक्यावर दुसरा गुन्हा दाखल करण्यात आलाय.. मात्र गुन्हे दाखल होऊन चार दिवस झाले तरी खोक्याला पकडण्यात पोलिसांना यश आलेलं नाहीय..शिरूर पोलीस ठाण्याची दोन पथकं खोक्याला पकडण्यासाठी रवाना झालीयत.. मात्र खोक्या पोलिसांच्या हाती लागलेला नाहीय.. व्हायरल झालेल्या मारहाणीच्या व्हिडिओ प्रकरणात खोक्यावर शिरूर पोलिसांत 2 गुन्हे दाखल आहेत. मात्र याआधीही खोक्यावर अनेक गुन्हे दाखल असल्याची माहिती समोर आलीय..
आतापर्यंत खोक्यावर किती गुन्हे दाखल?
शिरूर – एका व्यक्तीला बॅटने मारहाण केल्याप्रकरणी 2 गुन्हे
शेवगाव – कौटुंबिक हिंसाचार आणि सदोष मुष्यवधाचा गुन्हा
पाटोद्यातील अमळनेर – खुनाचा प्रयत्न, मारहाण, घातक शस्त्राने मारहाण, बेकादेशीर जमाव जमवून दंगा घडवून आणण्याचा गुन्हा
नेवासा – सदोष मनुष्य़वध, दंगा घडवून आणण्यासंदर्भात गुन्हा
पाथर्डी – अपहरणाचा गुन्हा
शिरूर – घातक शस्त्राने मारहाण, बेकादेशीर जमाव जमवून दंगा घडवून आणण्यासंदर्भात गुन्हा
असे एक ना अनेक गंभीर गुन्हे आतापर्यंत सतीश भोसले उर्फ खोक्यावर दाखल आहेत.बॅटने मारहाण केल्या प्रकरणी चार दिवसांपूर्वी गुन्हा दाखल झालाय. मात्र या आधी खोक्यावर जे गंभीर स्वरुपाचे गुन्हे दाखल होते त्यावर खोक्यावर का कारवाई केली गेली नाही.? एवढे गंभीर गुन्हे दाखल असतानाही खोक्या मोकाट का फिरत होता?.सोशल मीडियावर शोबाजी करणारा खोक्या पोलिसांना कसा सापडला नाही.असे एक ना अनेक प्रश्न उपस्थित होताहेत. आता चर्चा झाल्यानंतर आणि माध्यमांनी विषय़ उचलून धरल्यानंतर पोलिसांची धावपळ सुरू झालीय. मात्र चार दिवस खोक्या पोलिसांच्या हाती सापडले नाहीय. त्यामुळे खोक्या गेला कुठे असा प्रश्न उपस्थि होतोय.
खोक्या अनेक वर्षांपासून वनविभागाच्या जागेवर अतिक्रमण करून वास्तव्यास होता. वनविभागाच्या जागेवर त्याने एक ग्लास हाऊस उभारलंय. त्याचे एक एक कारनामे समोर आल्यानंतर वनविभाग आणि पोलिसांच्या तपासात ही माहिती समोर आली. खोक्या भाई रहात असलेल्या परिसरात वनविभागाने कारवाई करत अतिक्रमण उठवले. इतरांच्या झोपड्या वनविभागानं हटवल्या. खोक्याच्या ग्लास हाऊसवर मात्र अद्यापही कारवाई करण्यात आलेली नाहीय.
खोक्याच्या ग्लास हाऊसवर हातोडा कधी?
खोक्या राहत असलेली शिरूर तालुक्यातील झापेवाडीची जागाही वनविभागाची आहे. खोक्या अनेक वर्षांपासून वन विभागाच्या हद्दीत अतिक्रमण करून वास्तव्याला होता.खोक्यासह त्याचं कुटुंबही इथेच वास्तव्याला होतं. अनेक वर्ष वनजमिनीत अतिक्रमण असूनही वनविभागाने कारवाई का केली नाही? असा प्रश्न विचारला जातोय.सर्वसामान्यांनी वनविभागाच्या नियमांचं उल्लंघन केलं तर वनविभागाकडून तत्काळ कारवाई करण्यात येते. मात्र खोक्यावर एवढ्यावर्षांपासून का कारवाई केली गेली नाही असा सवाल आता उपस्थित होतोय. तर वनविभागाने तक्रार केल्यास कारवाई करू असं शिरूर पोलिसांनी म्हटलंय. एवढ्या वर्षात वनविभागाने खोक्याला अभय दिलं होतं का? की जाणिवपूर्वक डोळेझाक केली हा प्रश्न निर्माण होतोय. खोक्याचे एवढे कारनामे समोर येऊनही अद्याप त्याचा क्लास हाऊसवर कारवाई करण्यात आलेली नाहीय. वन विभाग खोक्याच्या क्लास हाऊसवर हातोडा कधी टाकणार असा प्रश्न उपस्थित केला जातोय.
Source link
by Hansraj Agrawal | Mar 10, 2025 | Trending News
ST Bus Mahamandal: लालपरी ही गावाखेड्यात धावते. गावातील नागरिकांसाठी एसटी ही जीवनवाहिनी आहे. मात्र एसटी गावात कधी येणार किंवा स्टँडवर कधी येणार याची वाट पाहावी लागते. एसटीच्या वेळा माहित नसल्याने कधी कधी प्रवाशांना ताटकळत उभं राहावं लागतं. मात्र आता लवकरच प्रवाशांना एसटीचे लाइव्ह लोकेशन कळणार आहे.
राज्य मार्ग परिवहन (एसटी) महामंडळाने विकसित केलेल्या अॅपवर प्रवाशांना त्यांच्या तिकिटावरील क्रमांकाच्या माध्यमातून ‘लालपरी’चे लाइव्ह लोकेशन कळणार आहे. बस स्टॅन्डवर कधी येईल, हे अचूक समजणार असल्याने त्यांना बससाठी ताटकळावे लागणार नाही. एसटीच्या ताफ्यातील सर्वच बसगाड्यांना व्हेईकल ट्रॅकिंग सिस्टिम (व्हीएलटी) बसविल्यावर अॅपवर बसची माहिती उपलब्ध होणार आहे. तांत्रिक बाबी पूर्ण झाल्यावर येत्या काही आठवड्यांत ही सुविधा सुरू होण्याची शक्यता आहे.
लांबपल्ल्याचा प्रवास करणाऱ्या प्रवाशांना आगाऊ तिकीट काढूनही बस नेमकी कोणत्या ठिकाणी आली, मधल्या थांब्यावर नेमकी कधी येणार, याची माहिती मिळत नाही. परिणामी त्यांना ताटकळत राहावे लागते. महामंडळाने यासाठी तयार केलेल्या ‘व्हीएलटी’च्या मदतीने बसचे थांबे आणि त्यांच्या निवडलेल्या स्थानकामध्ये ती येण्याचा अपेक्षित वेळ अगोदर समजणार असल्याचे अधिकाऱ्यांनी सांगितले. मराठी आणि इंग्रजी भाषेत हे अॅप वापरता येईल.
असे समजणार एसटीचे लोकेशन
प्रवाशांना अॅपमधील ‘ट्रॅक बस’ या सुविधेत तिकिटावरील ट्रिप कोड टाकल्यावर बसचे लाइव्ह लोकेशन समजणार आहे. त्यामध्ये इतर मार्गावरील गाड्यांचे थांबे हेदेखील समजणार आहे. एसटीच्या मुंबई सेंट्रल मध्यवर्ती कार्यालयात अद्ययावत नियंत्रण कक्षाची स्थापना केली असून, त्याद्वारे राज्यभरातील एसटीवर नियंत्रण ठेवण्यात येणार आहे. तसंच, एसटी बिघडली किंवा अपघात झाल्यास या अॅपमधून यंत्रणांना फोन करण्याची सुविधाही देण्यात आलीय. गाडीचा चालक व वाहक यांचीही माहिती त्यामध्ये उपलब्ध करण्यात येणार असून, एखाद्या मार्गावर किती बस, कोठे आहेत आणि स्थानकावर पोचण्यास किती वेळ लागू शकतो, आदी माहितीही प्रवाशांना या ॲपमध्ये पाहता येणार आहे.
Source link
by Hansraj Agrawal | Mar 9, 2025 | Trending News
Satish Bhosale Beed: मागील अनेक दिवसांपासून फरार असलेला सतीश भोसले उर्फ खोक्याला अटक करण्याची मागणी जोर धरु लागली आहे. खोक्याच्या अटकेसाठी बीडच्या शिरुरमध्ये मोर्चा काढण्यात आला होता. तसंच खोक्यांनी केलेल्या गुन्ह्यात सुरेश धसांना सहआरोपी करण्याची मागणी देखील मोर्चातून करण्यात आली आहे.
सतीश भोसले उर्फ खोक्या भाईच्या अटकेसाठी शिरुर बंदची हाक देण्यात आला होती. हाक देत पोलीस ठाण्यावर मोर्चा काढण्यात आला होता. मागील अनेक दिवसांपासून खोक्या भाईचे व्हिडिओ सोशल मीडियावर व्हायरल होत आहेत. तसंच त्याच्यावर विविध कलमाअंतर्गत गुन्हे देखील दाखल करण्यात आले आहेत. तरीही आरोपी खोक्याला अजून अटक करण्यात अपयश का आले? असाही सवाल मोर्चेकरांनी केलाय. तसंच खोक्या हा सुरेश धसांचा कार्यकर्ता असल्यानं सुरेश धसांवरही कारवाई करण्याची मागणी करण्यात आली आहे.
काय आहेत आंदोलकांच्या मागण्या?
राजकीय वरदहस्तानं खोक्या आणि त्याच्या सहका-यांचा वन्यजीवांच्या तस्करीचा व्यवसाय आहे. आरोपींवर वन्यजीव कायद्यानुसार गुन्हा दाखलकरा ढाकणे कुटुंबाची पोलिसांनी तक्रार का घेतली नाही याची चौकशी करा. पोलिसांवर कुणी दबाव टाकला याची चौकशी करावी अशी मागणीही करण्यात आली आहे. आमदार सुरेश धस यांनाही सहआरोपी करावे, सतीश भोसलेचे आणखी कोणते अवैध धंदे आहेत याचा शोध घ्यावा.
सतीश भोसले उर्फ खोक्यानं आतापर्यंत 200 काळवीट तसंच 50 मोरांची हत्या केलीय असा आरोप मोर्चेकरांनी केला आहे. तसंच या वन्य प्राण्यांचं मांस खोक्या काही राजकीय नेत्यांना देत असल्याचा आरोप देखील मोर्चेकऱ्यांकडून करण्यात आला आहे. मागील काही दिवसांपासून खोक्याचे प्रताप समोर येत आहेत. कधी खोक्या टेबलावर पैसे फेकतोय. तर कधी खोक्या डीजेच्या गाडीवर चढून पैशांची उधळपट्टी करतोय. तर कधी कारमध्ये पैशांचा माज करताना दिसतोय. खोक्यानं शिरुरमधील शाळेत जात विद्यार्थ्यांना धमकी दिल्याचा देखील व्हिडीओ व्हायरल झाला होता. यात खोक्या हा विद्यार्थ्यांना हातपाय तोडण्याची धमकी देतांना दिसतोय.
मागील काही दिवसांपासून फरार असलेल्या खोक्याला अटक करण्याच्या मागणीसाठी ग्रामस्थ रस्त्यावर उतरले आहेत. तसंच खोक्याला लवकर अटक न केल्यास आणखी तीव्र आंदोलनाचा इशारा हा मोर्चेकरांनी दिला आहे.
Source link
